Ik verstoh dat nich. Wat is dat blots för een Geschiss, wat de Lüüd düsser Doge so um den Bort vun een Kerl mooken? Ik meen, kann dat nicht eenfach so as freuher een moodschet „Accessoire“ sein, dat een Mann so drägt as he dat lustig finnet?? Keen Bort, Snurrbort, Backenbort, Menjou-Bort, Vullbort… un siet Miami Vice mitünner sogor ’n Dree-Doge-Bart. Un dann geiht dat jichtenswann alln’s wedder vorn vorn los. Is dat nich genuch?
Tscha, ik glööv nich. Intwüschen beschäftigt sik sogor dat Feuilleton in de seriösen Zeitungen mit dat olle Gestrüpp in de Gesichter vun de Mannslüüd. Do gifft dat elend lange Theorien vun de Presseminschen un sogor vun Psychologen, wat so’n Bort to bedüten hat. So schall dat to’n Bispeel bi manche Kerls een „Gegenentwurf zur weiblichen Emanzipation“ sien. Nu mutt ik ehrlich togeven, dat ik mi inne Welt vun de heterosexuelle Mannslüüd nich so utkenn, ober mookt dat No Ma’am-T-Shirt vun Al Bundy do nich veel mehr Sinn? Ik meen, do is de Botschap doch indeutig, ober bi’n Bort mutt du överlegen, ob de Kerl nu wirklich gegen de Emanzipatschoon is ode ob he den Heuballen in sien Gesicht blots ut kosmetische Erwägungen hett wiel he en vun düsse Hipster is oder viellich ’n Norbe verstecken wüllt föör de he sik schomt..
Een anner Theorie seggt, dat ’n Kerl mit Bort de Nees so richtig vull hett vun unse övertechnische Welt mit ihre Smartphones und Computers – do schall de Bort een Zeichen föör „zurück zur Natur“ sein.
Buten in’t echte Leven is dat fast no schlimmer. Do seggt de Kerls mit Bort, dat een Mann ohne Bort gor keen echten Mann is. Un de Kerls ohne Bort froogt sik mannigmol, welche verdrexten Komplänge… nee, verdrängten Komplexe een Kerl hat, dat he sik achtern Bort verstecken mutt. Annere Klookschnackers seggen, dat de Bort een Zeichen för Charakterfestigkeit un Mut is. Bi manche Gays is düsse Reduzierung vun een Minschen op sien Bort vun Tiet to Tiet so schlimm, dat ik mi mannigmal insgeheim wünsch, mien „Mitgliedsutwies“ to düssen exclusiven Club torüchgeven tö können – as hätten wi keen anner Probleme so as de gesetzliche Gliekstellung.
Kinners, die sün doch all mall in’n Kopp! Nix seggt de Bort över dat Wesen vun een Mann ut. Gor nix! Wenn so’n utwassenes Mannsbild, eent niegentig groot, Figur as’n Priesboxer un mit Hannen so groot as Baggerschaufeln un eben mit Bort binoh hysterisch worrt, wenn he ’n Spinn in sien Wubb sitten sieht, denn kunn da jo trotz Bort mit de Charakterfestigkeit ode tominnest mit sien Mut nich so wiet her sien, ode?!
Un dorüm segg ik: Wenn du pünktklich to’n Verabredung kümmst ode dien Wort hält, mi bi’n Umtog to hölpen – dat seggt mi, dat du ’n goten Kerl mit ’n fein’n Charakter büst!
Wenn du een ole Dame över de Stroot hölpst ofschoon du eenich keen Tiet hest – dat seggt mi, dat du ’n goten Kerl mit ’n fein’n Charakter büst!
Wenn du Mist baust, dat insiehst un alln’s versökst, um dat wedder got to moken – dat seggt mi, dat du ’n goten Kerl mit ’n fein’n Charakter büst!
Un wenn du dat alln’s nich so mookst, büst du halt ’n Dröhnbüddel un hest keen’n fein’n Charakter.
So eenfach is dat, un ob du bi dat allet so’n ollet Strohdach ünner de Nees hest ode blank as ’n Kinnermors büst… dat is mi pottegol!
Wortgepüttscher 