Nu ober mol in’n Ernst

Siet vöörgistern is alln’s vöörbi. Is jo Aschdag wesen. Ober dat Thema Karneval lasst mi nich so weerklich lots. Annerendogs heff ik mi jo so’n böten wat över den Karneval ründ üm Rhein un Main lustig mookt. Ober dat gifft ook wat, dat mi bannig beeindruckt hett. In all düsse Dokumentationen, de mien Mann in’n Glotzschapp kiekt hett, is een Noom jümmer wedder vöörkamen: Ernst Neger.

Sien richtigen Baantje is Dachdecker wesen, ober vöör veele Johrteinte hebben se sik ehm in Mainz nich ut’n Karneval wegdinken kunnen, wiel he ook so toll sungen hett. Twee vun sien Leeders sünd de Lüüd no ganz besünners in’n Kopp und vöör allem in’t Hart bleven.

Niegenteinveerunfofftig is de tweete Weltkrieg men jüst teihn Johr to End wesen. Överall hebben no Trümmers legen, dat Weertschaftswunner is noch nich vull an’t Lopen wesen, und nich wenig Lüüd sünd vun ehr Eten jümmer noch nich wedder satt worrn. Het noch bannig böös in Düütschland utseehn. In den Johr is Ernst Neger mit dat ole Kinnerleed Heile, heile Gänsje (Heile, heile Gänschen) op de Bühne kamen. Domit hebben Mudders freuher ehr Kinners tröstet, wenn se sik bi’t Speelen wat wehdohn hebben ode mol mit de Fingers an en blakende Keers kamen sünd. Ober in düsset Johr hett Ernst Neger twee niege Versens hintodichtet un domit sien Stadt Mainz un de Lüüd gliesk mit tröstet. De Sinn vun sien Wöör is in etwa „De Krieg much allens in Schutt un Asch leggt harrn. Is schaad, dat deit uns weh – ober bald is ook dat vöörbi un alln’s wedder got“ wesen.

Op eenmol… bi so’n grote Fest, wobi dat eenich blots um Lachen, Spoß un Freid gohn schall… hebben do hünnert vun Lüüd seten, geblarrt un sik vör erhn Tronen nicht schomt. Eenmal rut loten wat een bedrückt, nodem een sik dat Johre lang nicht traut hett.

Teihn Johr loter hett Ernst Neger doföör sorgt, datt de Minschen no all den Schrecken vun den Krieg un no de Mühen vun’n Wedderopbau endlich mol wedder so richtig vun Harten Spaß hebben kunn’n. Sien Humba Täterä hett de Lüüd bi Mainz bleibt Mainz wie es singt und lacht so vun’n Stohl haun, datt se noch över een Stünn wiedersungen hebben, ofschoon Ernst Neger al lang nich mehr op de Bühn wesen is. De Elferrot vun de Veranstaltung is so hölplots weesen datt se nix anneres hebben dohn kunn’n as Tiedung lesen! De Lüüd vun’t Fernsehen sünd ook ganz dööreenanner wesen. Kennt ji noch düsse ole Inblendung, de dat sünst blots bi Hans Joachim Kulenkampff geven hett? „Die nachfolgen Sendungen verschieben sich um voraussichtlich sechzig Minuten.“

Domit ober nich genuch. No düsse Fernsehsendung is dat Humba Täterä döör ganz Düütschland gangen. Överall harrn se dat sungen, as weer ’n groten Knütt platzt.

Wenn een Künstler dat schafft, de Lüüd so tosomenrücken to loten, datt se tosomen singen un dat sölve feuhlen, un wenn un dat jüst döör de Kraft vun düsset Lied schietegol is, ob de Minsch blang ehm nur arm ode riek, ’n Arbeider ode ’n Avkaat, ob he in’n Villa wohnt ode in Mietskasern – doföör harr ik bannig grooten Respekt.

Lacht mi ruhig ut, wenn ji dat wüllt, ober föör mi sünd Heile, heile Gänsje un Humba Täterä vun Ernst Neger jüst so genau so wichtige Lieders, de de Lüüd tosomenrücken loten as Pete Seegers We Shall Overcome ode – dat is quasi de Hymne vun mien Generation wesen – Wind Of Change vun de Scorpions.

Bi allen Respekt mookt mi dat ober ook bannig wat nodinklich. Ik meen, do is düsser Doge so veel lots in de Welt, dat weerklich nich goot is. Wokeen schall wull in twinnig, dörtig Johren föör uns dat Heile, heile Gänsje und dat Humba Täterä singen, jüst wenn wi dat an’n meesten nötig harrn? Ode kriggt wi dat no hin, datt dat gor nich erst so wiet kummen mutt?

Advertisements

Püttscher mit!

Trage deine Daten unten ein oder klicke ein Icon um dich einzuloggen:

WordPress.com-Logo

Du kommentierst mit Deinem WordPress.com-Konto. Abmelden / Ändern )

Twitter-Bild

Du kommentierst mit Deinem Twitter-Konto. Abmelden / Ändern )

Facebook-Foto

Du kommentierst mit Deinem Facebook-Konto. Abmelden / Ändern )

Google+ Foto

Du kommentierst mit Deinem Google+-Konto. Abmelden / Ändern )

Verbinde mit %s