Se sind hier (op Platt)

Kennt ji all düssen Film Poltergeist? Do gifft dat doch düsse Szene, wo de lütte Deern mit de blonde Hoarn vöör’n Glotzschapp sitt un blots op den „Snee“ op de Mattscheibe pliert. Als ehrn Öllerns doto kommen, seggt se mit so’n ganz drömelige Stümm: „Sie sind hier.“ Un denn fangt de Stress föör düsse Familie erst richtig an. Hefft ji dat all mol sehen?

Schon Shakespeare hett wusst: Dat gifft mehr Dingens twüschen Himmel un Eer as uns Schoolwiesheit sik dröömen laat. Dat fallt mi besünners jedet Johr in’n Sommer op. So’n kommodiger Sünndogmorgen is jo wat Fienet. Du sloopst ’n böten wat länger, du neemst di richtig veel Tiet föör das Freuhstück. Un so wieter. Du lotst di dat richtig goot geihn.

Is bi mien Mann un mi nich anners. Ik sitt no’n Freustück meest in de Köök un lees mien Keesblatt, mien Mann mookt sik dat op’t Sofa bequem un mookt sik den Glotzschapp an. Wat he sik denn do ankiekt, kunn ik in de Köök tomminest noch hörn. In Winter is dat keen Problem – de Schnack bi de Sendung mit der Maus ode Wissen macht Ah ode ok mal bi’n Wiederholung vun’n oolet Theoterstück deiht nich weh.

In Sommer – jüst as nu – is dat anners. Do frei ik mi richtig, datt ik op’n Balkon ode sogar in Gorten türmen kunn. Denn kiekt mien Mann neemich wat anneres. He verännert sik…

Sünst is he neemich een, wokeen dat aktuelle Tüch höört, dat se in’t Radio op WDR 2 ode mannigmool ook op EinsLive speelt – Tote Hosen, George Ezra, Ed Sheeran, Adele, Portugal The Man un wie se alle heeten.

Ober nich, wenn he in’n Sommer op’n Sünndogvöörmiddag vöör’n Glotzkasten sitt. Denn schallt op eenmal sowat as Santiano, Tony Marshall ode Marianne & Michael to mi in de Köök. Dat alleen macht mi schon bang. Goh ik deen ook noch röver in uns gode Stuuv, liggt mien Mann nich op sien Sofa, nee, he sitt ganz ordentlich dor und kiekt Immer wieder sonntags un dorno ZDF Fernsehgarten. Ode as ik segg: „Schattige-Pinie-TV“.*) Dorbi seht he meist as andächtig ut as mien Oma vöör twintig Johrn in ihren olen Ohrensessel.

Sünd düsse bieden Sendungen vorbi, is mien Mann wedder jüst as sünst: WDR 2, aktuelle Charts.

Weet ji, wat ik glööv?

Ik meen, tominnest an’n Sünndog in Sommer twischen klock teihn und klock twee?

„Sie sind hier.“

 

*) De Schattige Pinie is in een Kult-Comedy-Serie ut de 1980er een Ollenhus wesen, ut dat een von de Hauptfiguren türmt is.

Advertisements