Moin un frohet nieget Johr.
Goot binnen kamen? Bi mien Mann un mi is dat so entspannt afgangen as lang nich. Wi sünd neemich so mööd wesen, datt wi nich mol Dinner for One un Tratsch im Treppenhaus kiekt hefft. Wi hefft uns twors no wat Feinet to’n Altjohrsobend kocht un achterno wedder klor Schipp in de Köök mookt, ober um halvig teihn sünd wi so mööd wesen, datt wi to Bett gangen un in’t niege Johr röverslummert sünd. Mitternacht, dat Anstoßen un vöör all’n de ganze Knallerei mit ehrn bunten Lichters sind total an uns vörbigangen.
An’n Niejohrsmorgen heff ik sogor meist dacht, datt wi ut Versehen bit in’n Freuhling liggen bleven sünd. Ode datt gar nich knallt worrn is. Bi’n ersten Blick ut’n Fenster is de Stroot vor uns Huus neemich so schier un oprümmt wesen, as weern Maanden siet Altjohrsobend vergangen un nich blots ’n poor Stünnen. In’n Rest vun de Naverschap hett dat jüst genauso utsehen. Blots ‘n böten Konfetti hett rumleggen, un een ode twee leere Flaschen Prickelwien.
Dor is bi mi meist een Geföhl von déjà vu opkamen, denn jüst vöör een Johr heff ik dat sölve dacht. Un noch een Johr eher ook. Is dat nich fein, datt jümmer mehr Lüüd vun ganz alleen marken, datt de ganze wilde Kracherei und Ballerei nich mehr in düsse Tiet passt? Alln’s över Verbote un Gesetzen to regeln mookt se sowieso blots obsternaatsch, un dat bringt een denn erst recht dat, wat een gor nich hebben wüllt.
Viellicht kommt jo nu jümmer mehr Lüüd op die Idee, vun sik ut wat to ännern. Ode se nehmt tominst Vorschläge vun andere Lüüd an, so as Greta Thunberg un annere öffentliche Personen, de sik föör’n saubere Umwelt un ‘n beteret Klima insett. Dat gifft mi ‘n Hoffen föör düsset Tiet no’n Johreswessel, de uns ook ’n nieget Johrteihnt bracht hett. Un Hoffnung könnt wi gut bruuken.
Wortgepüttscher 